Mizo Theological Forum

Pornography hi tunlai khawvela kan nun tibuaitu lian tak zinga mi a ni. Hmun tinah kan ban phak maiah pawh a awm tawh a, kan tan pawh harsatna lian tak a lo ni ve ta der mai le. Sex hi Pathian thilpek, zahawm tak hman tur a nih laiin pornography hian Pathian thilpek a nihna leh a zahawmna a tibawrbang nasa hle. Tunlai thangthar tam ber hi pornography lamah an mikhual lo hle a, college zirlai leh high school zirlai tam takin sex chungchang ziakna leh a lem chuanna lehkhabu, CD, Movies leh Internet an chhiarin an en tawh a, mobile phone ngei pawh hetiang tih nan hian an hmang nasa hle nia sawi a ni.

Pornography hian mihring rilru leh ngaihtuahna a luah nghetin a tikhawlo thei a. Kan thil en leh chhiar khan chakna nasa min pe a, chumi tihreh nan chuan thil mawi lo leh tha lo tak pawh kan ti mai thin. Pornography hi thil dang ang bawka chin dawklak theih tak a ni ve tho va. Miin a chin dawklak tawh chuan a rilruah a bei tlat a, thil dang a ngaihtuah hlei thei tawh lo va, a nun pum pui a nghawng hial thin a ni. Hetiang dinhmuna mi a din tawh chuan a zirna leh a hna pawhin a tuar thei a, a hun hlu tam tak chutiang thil tih nan leh ngaihtuah nan a khawral thin a ni. Fianriala an awm pawhin a ngaihtuahna a rawn luah a, Pathian pawlna leh mahni inngaihtuahna hun pawh hmang thei lovin a awm theih a ni.